Reclamar da Xunta que dote aos colexios do persoal que necesitan para ofrecer maiores estándares de calidade é o que buscamos ao apoiar as manifestacións que pais e nais convocan para o 20 de novembro, Día Mundial da Infancia, diante dos colexios Valle Inclán, Juana de Vega, Luis Seoane, Rabadeira e Parga Pondal. Hai que ir con roupas negras.
Reclamamos que o goberno de Rueda deixe de escatimar coa educación e cumpra os estándares que necesitan os colexios. Por exemplo, este ano ratearon con profesores de pedagoxía terapéutica e audición e linguaxe, mestres titores e de rezorzo… xa non falemos doutros proxectos educativos de excelencia, que tiñan gran interese para o alumnado, pero que non se levarán adiante.
Os recortes son múltiples, aínda que este ano afectou sobre todo aos colexios de Perillo e Nós, pero os demais xa saben iso das barbas do veciño.
En Oleiros sabemos ben o que significa un ensino de calidade. Por iso dedicamos cada ano miles de euros a actividades complementarias que a Xunta non cubre: traballamos directamente co profesorado para ofrecer ao alumnado un amplo abano de posibilidades para coñecer o entorno, mellorar a convivencia e educarse en valores como ampliación das disciplinas xa regladas no sistema educativo.
