Alternativa dos Veciños é un grupo político independente nacido do movemento veciñal de Oleiros. Somos un grupo singular e distinto. As decisións principais, así como os procesos de elaboración das listas electorais, determínanse a través de asembleas e procesos democráticos abertos a toda a cidadanía.

Non temos carnés nin cotas de afiliación; non estamos supeditados a ningún ideario político encasillado no espectro político actual.

Somos abertos, respectuosos co ideario político de cada quen, pero iso sí, profundamente progresistas e defensores do ser humano, e consideramos que os dereitos humanos non teñen fronteiras nin muros, nin teñen por que ter voces que se autoelixen xuíces que deciden quen ten dereito a comer, e quen non; quen ten dereito a vivir, e quen non; que pobo pode ser soberano e que pobo ten que vivir sometido ós grandes poderes que manexan o mundo.

Se queres axudar a conseguir que as túas veciñas e veciños vivan mellor, se tes ideas que aportar, se queres traballar por un Oleiros aínda mellor, se pensas que tes tempo e gañas de axudar a avanzar á túa comunidade, ao teu pobo ou parroquia, poderías unirte a nós.