A cidadanía é cada vez máis consciente dos perigos que pode supoñer o mar, xa que as irresponsabilidades á hora de utilizar os areais e a costa cada vez son menores, a xulgar polos resultados da campaña de praias de Oleiros. Rexistráronse bastante menos incidentes que no ano anterior, aínda que a presión turística foi maior, en xeral en todo o país.
O dispositivo de seguridade marítima é complementario a outros como o 112 ou os de rescate no mar, que poden solicitar a intervención dos socorristas en espazos de costa que non son praias. En canto a estas últimas, teñen postos de atención directa en Santa Cristina, Bastiagueiro, Santa Cruz – Naval, Mera e Espiñeiro.
Case 300 picaduras de escarapotes e 4 de medusa, ademáis de 381 pequenas feridas son un pequeno balance do acontecido durante o verán, ao que hai que engadir un traslado ao hospital e dúas insolacións. Un dispositivo que ademáis atendeu especialmente a 109 actividades de verán que diversos grupos de persoas organizados se realizaron nas praias, maiormente organizadas polo Concello e dirixidas á poboación en idade escolar.
Máis da metade dos incidentes rexistráronse con persoas de Oleiros, aproximadamente un tercio con persoas da Coruña e área metropolitana e o resto de persoas do resto de Galicia e o exterior, o que ofrece unha idea da procedencia das persoas que utilizan as praias do municipio.
Un servizo que conta con dúas distincións de Bandeira Azul pola calidade do servizo que presta.
