Juan Antonio Fariña Pedreira foi presentado por Ángel García Seoane, presidente de Alternativa dos Veciños, como cabeza de lista no concello de Bergondo. Fariña é actualmente o primeiro tenente de alcalde e concelleiro de infraestruturas, urbanismo e medio ambiente.

O traballo de Juan Fariña e Eloy Babío no Goberno municipal de Bergondo durante a presente lexislatura supuxo un punto de inflexión na acción de goberno. “Houbo avances que calquera observador obxectivo pode apreciar. Mais isto non nos impide recoñecer que aínda existen múltiples carencias e que queda moito por facer para chegar á ‘primeira división’ dos concellos”, comentou o candidato.

Para seguir nesa senda de traballo e de melloras paulatinas, Bergondo precisa unha renovación na maioría de goberno. “Contamos coa experiencia e co asesoramento de Alternativa dos Veciños e cremos que podemos chegar moi lonxe como concello”, sinalou Fariña.

“Fariña é un home capaz, con experiencia, cun importante percorrido político, que sabe xestionar e que podería ser un gran alcalde para Bergondo”, comentou Ángel García Seoane.