Segundo trasladan os propios afectados, estas incidencias veñen producíndose desde hai anos, cun incremento significativo durante o último ano.
Os cortes de luz repetidos, as baixadas e subidas de tensión e os continuos picos eléctricos, son o habitual para a veciñanza de Taramuño, chegando incluso a producirse numerosas incidencias nun mesmo día.
Esta situación está a ocasionar importantes prexuízos na vida cotiá da veciñanza e sen que UFD, sendo coñecedora da problemática , buscase unha solución .
Desde AVCarral destacan que esta problemática afecta de maneira especial ás persoas maiores, dependentes e con discapacidade, que precisan dunha subministración eléctrica continua para o funcionamento de camas articuladas, guindastres de mobilización, dispositivos médicos e outros equipos imprescindibles para a súa seguridade e benestar.
As incidencias tamén dificultan a carga de vehículos eléctricos, afectan ao teletraballo e aos estudos, provocan avarías en electrodomésticos e equipos eléctricos, ocasionan perdas de alimentos polos cortes de subministración e impiden desenvolver con normalidade numerosas tarefas cotiás nos fogares.
No escrito presentado, Alternativa dos Veciños de Carral solicita que UFD leve a cabo unha inspección técnica urxente da rede eléctrica que abastece Taramuño, realice medicións da calidade da subministración, investigue a orixe destas incidencias e adopte as medidas necesarias para garantir unha subministración estable, segura e de calidade.
Así mesmo, a formación solicita que a empresa informe por escrito das actuacións realizadas, das conclusións obtidas e das solucións previstas para resolver definitivamente un problema que leva anos afectando á veciñanza e que se viu notablemente agravado durante o último ano.
Desde AVCarral consideran que esta situación “non pode seguir prolongándose no tempo nin poñer en risco a calidade de vida da veciñanza, especialmente das persoas máis vulnerables”, polo que confían en que UFD actúe coa máxima dilixencia para ofrecer unha solución definitiva.
