O Grupo Municipal de Alternativa dos Veciños vai levar ao pleno de mañá mércores unha moción para que o Concello de Arteixo lle solicite á Xunta de Galicia unha sala de radioloxía para un dos centros de Atención Primaria do municipio, así como os profesionais sanitarios precisos. Desde Alternativa considérase que desta maneira é posible ofrecer un mellor servizo sanitario á veciñanza, liberando e axilizando o colapso que sofre habitualmente o Complexo Hospitalario Universitario da Coruña.

A moción de Alternativa dos Veciños tamén contempla a solicitude dunha reunión á Consellería de Sanidade, na que poidan participar todos os grupos municipais, para expoñer os problemas existentes nos centros de saúde e as medidas que se poderían adoptar.