Alternativa dos Veciños de Cambre votou en contra ante as tres modificacións das normas subsidiarias levadas no día de onte a pleno, trasladando novamente que a prioridade para a veciñanza é un plan xeral, que ampare actuacións urbanísticas sen especulación nin irregularidades.

O goberno municipal na súa segunda lexislatura segue a botar balóns fora culpando a outras administracións de que non hai Plan Xeral, mentres gasta recursos municipais para recalificar terreos irregularmente, favorecendo a especulación e sen dar solucións reais ás problemáticas que viven a diario a veciñanza do Temple (tráfico, falta de aparcadoiro, servizos municipais xustos,…)

O goberno municipal aprobou tres modificacións provisionais, un aumento de edificabilidade na Costa da Tapia (terreos de Malasa). Unha zona comercial para a N-VI que repercutirá negativamente no tecido comercial do barrio, que é o motor económico da zona. E, enfronte do colexio Portofaro, dará lugar a unha modificación dun viario que daría saída ao tapón do Paraugas e Costa da Tapia.

É chamativo o voto en contra de todos os grupos da oposición, tan dispares en ideoloxías. Dende o goberno municipal non se deron moitas explicacións nin tampouco se abriron ao debate nos casos da N-VI e o Portofaro, o que deixa á luz á presa e moitas incógnitas no aire.

-O goberno local vende estas actuacións como o futuro de Cambre, pero que lle pregunten á veciñanza de San Lourenzo, Andeiro, Meixigo, Pravio ou Sigrás, por exemplo, si isto suporá un beneficio para eles? Mentres o Plan Xeral está no caixón…- cuestiona o Portavoz e Concelleiro de Alternativa dos Veciños de Cambre.