Alternativa dos Veciños manifesta a súa tristeza polo falecemento do ilustre escritor Xabier P. Docampo e traslada as súas condolencias á familia e amigos deste magnífico autor. O Goberno municipal de Alternativa dos Veciños quere expresar o seu agradecemento a Xabier P. Docampo pola súa produción literaria, pola súa sempre disposta colaboración e polo seu compromiso coa cultura e coa lingua.

Xabier P. Docampo é un dos escritores máis recoñecidos da literatura galega, un dos grandes renovadores da literatura infantil e xuvenil, que incorporou a numerosos lectores e lectoras con obras como “O misterio das badaladas”, “A chave das noces”, “A casa da luz”, “Bolboretas”, “O país durminte”, “Catro cartas”, “O pazo baleiro”, “O país adormentado”, “A illa de todas as illas” ou “O libro das viaxes imaxinarias”. Recibiu numerosos premios, entre os que destacan o Premio Nacional de Literatura Infantil e Xuvenil por “Cando petan na porta pola noite” ou o Premio de Narrativa da Gala do Libro de 2018 por “A nena do abrigo de astracán”.

Este insigne escritor visitou en moitas ocasións as Bibliotecas Públicas Municipais de Oleiros e sempre entusiasmou coa súa paixón pola lectura. Trátase dun referente ético para todos, unha persoa que sempre defendeu a lingua e a cultura galega, que fomentou a lectura e que tamén destacou polo seu compromiso co ensino público.