Alternativa dos Veciños de Arteixo volve solicitar ao Goberno local que presente no próximo pleno outra modificación das bases que regulan as becas comedor onde quede excluída a cláusula que obriga ás familias beneficiarias a presentar facturas para demostrar que dan de comer os seus fillos na casa.

A modificación das bases que regulan as becas comedor foi aprobada no pleno extraordinario que se celebrou o pasado día 23 de abril. Esta modificación incluía unha cláusula onde as familias beneficiarias para poder pasar a recibir directamente a contía que antes da suspensión das clases o Concello abonaba á empresa que realizaba o servizo nos centros, estas debían presentar unhas facturas xustificando as compras de comida para os seus fillos e fillas.
Sorprendentemente, a citada modificación foi aprobada cos votos a favor de todos os grupos que forman parte da corporación municipal.

Por iso, Alternativa solicita ao Goberno que no pleno ordinario que celebra o día 25 de xuño presente outra modificación das bases que regulan as becas comedor, onde quede totalmente excluída esta cláusula que o seu cumprimento é totalmente inviable para as familias e, que por tanto, estas quedarían sen poder recibir a contía que xa lles foi concedida inicialmente.

A concelleira de Educación, Inés Ramos, ten outra oportunidade para rectificar e pedir desculpas a estas familias. De non ser así, este Goberno volverá demostrar unha vez máis que as súas políticas se centran en machucar aos que máis o necesitan para beneficiar aos que máis teñen.