Alternativa dos Veciños de Arteixo presentou no rexistro da Consellería de Sanidade as 947 firmas recollidas para esixir melloras no servizo de pediatría nos centros de saúde do municipio e un pediatra para o PAC de Arteixo.

Os recortes e a precariedade imposta no sistema sanitario público de Galicia polo Goberno autonómico, están a provocar graves carencias na atención e na prestación deste servizo público. Nin os nosos nenos e nenas están a librarse das gravísimas carencias de recursos técnicos e sobre todo humanos. No Concello de Arteixo, os centros de saúde de Vilarrodís e Meicende teñen que compartir o servizo de pediatría, deixando sen cubrir o servizo de maneira alterna. Tamén, o PAC de Arteixo segue sen contar con servizo de pediatría, a pesar do notorio aumento da poboación na última década que sitúa o padrón municipal en máis de 33.000 habitantes.

Ante esta situación, Alternativa de Arteixo puxo en marcha unha campaña de recollida de firmas para demandarlle á Xunta de Galicia e ao Sergas servizo de pediatría en horario completo para os tres centros de saúde do Concello de Arteixo e un/ha pediatra para o PAC de Arteixo.

A campaña obtivo unha gran resposta por parte da veciñanza chegando a recoller en pouco tempo case mil firmas.

A representante Local de Alternativa, Noelia Martínez, espera poder reunirse co Xerente da Área Sanitaria da Coruña e Cee nos próximos días para tratar as carencias de persoal na atención primaria do municipio.