Alternativa dos Veciños leva entre as súas propostas de Goberno unha auditoría das contas do Concello para coñecer ata que punto o actual equipo de Goberno está a inverter os cartos de xeito correcto.

En Culleredo existe un grave problema coa contratación pública. Hai un gasto esaxerado e un descontrol económico que levamos denunciando xa un tempo. Os contratos dos grandes servizos como a limpeza viaria, a auga e axuda a domicilio están sen facer porque, segundo nos respondeu o Goberno en sesión plenaria, “sae máis barato”. Tan barato como pagar 3.000 euros ao mes por un servizo de conserxería que está sen contratar, cando sabemos que o conserxe non cobra esa cantidade. Onde están os cartos? Non se sabe. Como é coñecido denunciamos hai unhas semanas esta situación ante a fiscalía e se entramos no Goberno levaremos a cabo unha auditoría completa das contas do Concello de Culleredo.

Plan Xeral de urbanismo

O Plan Xeral é outra das nosas grandes prioridades. Levamos catro anos insistindo en que se contesten ás numerosas alegacións presentadas e que haxa unha nova exposición pública. Por que unha nova exposición? Porque o Plan que se expuxo inicialmente non ten nada que ver co que agora se quixo aprobar. O Goberno cambiouno de portas para dentro, tal e como reflicten os informes dos servizos técnicos do Concello.

O PXOM non pode ser unha carta branca para contentar os intereses particulares duns poucos. É unha garantía para ter un municipio ordenado, para que as veciñas e veciños saiban cal é o seu terreo e se teña en conta o interese xeral.

Desde Alternativa dos Veciños seguiremos a traballar, sexan cales sexan os resultados este domingo, para que a xente de Culleredo teña un Concello máis transparente, máis xusto e máis honesto con ela.

Mitin Central no Burgo xoves ás 20 horas

Como xa informamos, este xoves 23 de maio temos o noso mitin central no Burgo, na Praza de Galicia, ás 20 horas. Intervirán Alicia Ferreiro, candidata á alcaldía e Ángel García Seoane, presidente de Alternativa dos Veciños.

Peche de campaña en Vilaboa ás 20:30 horas do venres

O peche de campaña de Alternativa dos Veciños Culleredo celebrarase este venres día 24 de maio ás 20:30 na Praza da Igrexa de Vilaboa.