Ante as peticións recibidas por parte de numerosos comerciantes de Guísamo, Alternativa dos Veciños de Bergondo presentou no pleno municipal unha moción para instar ao Ministerio de Fomento a que estude a viabilidade de levar a cabo diversas actuacións de mellora na N-VI, ao seu paso por Guísamo. Todos os grupos da corporación votaron a favor desta proposta de Alternativa.

A construción dunha glorieta á altura do almacén de froita “Eurofruit” posibilitaría articular o tráfico de Guísamo entre esa rotonda e a xa prevista para a intersección coa estrada de Cambre. Con ese circuíto de glorietas poderíanse suprimir tanto a incorporación como a saída de San Paio, ademais de toda a illeta central pintada neste tramo de estrada. Do mesmo modo suprimiríanse viraxes á esquerda -xa a día de hoxe desaconsellables- e limitaríase a velocidade de tránsito polo núcleo central de Guísamo de xeito eficaz. Como consecuencia de todo iso poderíase gañar moito espazo para novo aparcamento nesas beiravías, notablemente ampliadas.