Abre o prazo para solicitar as prestacións de apoio á escolarización para o vindeiro curso
Desde mañá día 7 de xuño e ata o vindeiro 26 de xuño, todas aquelas persoas interesadas poderán solicitar as prestacións de apoio á escolarización do Concello de Oleiros para o curso 2018-2019. Estas axudas son unha das numerosas medidas pola inclusión social que ten recollidas no seu regulamento a Concellería de Servizos Sociais do Concello de Oleiros.
O seu fin é apoiar a aquelas familias, nunha peor situación económica, a asumir os gastos extraordinarios que provoca o inicio do curso escolar. Ademais, son compatibles con outras axudas similares que poda haber doutras administracións.
Os importes das axudas para o curso 2018/2019 son os seguintes:
– 2º ciclo de educación infantil: 70 €
– Educación primaria: 80 €
– ESO ou ciclo formativo equivalente: 90 €
– Bacharelato ou ciclo formativo equivalente: 110 €
Para calquera información, as persoas interesadas poden acudir ás oficinas do Departamento de Servizos Sociais ou chamar a través do teléfono de atención ao veciño do Concello de Oleiros, 981 610 000.
